Барилгын Хөгжлийн Үндэсний Нэгдсэн Төв

Монгол улсын шадар сайдын 2012 оны 42 тоот тушаалын дагуу “Үндэсний стандартын шинжлэх ухаан техникийн түвшингийн улсын үзлэг” тусгай удирдамжийн дагуу 2013 оны 1-р сарын 10-наас 2-р сарын 20-ны хооронд амжилттай явагдаж дууслаа. Энэ ажлын хүрээнд “Барилгын салбарын үндэсний стандартын шинжлэх ухаан техникийн түвшингийн улсын үзлэг”-ийг зохион байгуулах ажлыг БХБсайдын 2013 оны 08 тоот тушаалаар байгуулагдсан ажлын хэсгээс удирдан зохион байгуулж явуулсан. “Барилгын салбарын үндэсний стандартын шинжлэх ухаан техникийн түвшингийн улсын үзлэг” хийх ажлыг БХБЯамтай “Барилгын хөгжлийн үндэсний нэгдсэн төв” мэргэжлийн төрийн бус байгууллага гэрээлэн гүйцэтгэж удирдамжийн дагуу ажлаа амжилттай гүйцэтгэн хүлээлгэн өглөө.

Уг ажлаар 575 үндэсний стандартад судалгаа хийж цаашид хэвээр нь мөрдөх, дахин хянах, хүчингүй болгох, шинээр боловсруулах стандартуудыг тодорхойлсон юм.Мөн стандартын эрх зүйн байдал, олон улсын түвшний өнөөгийн байдал, цаашид хүрэх түвшнийг тодорхойллоо. Үзлэгийн дүнгээр цаашид салбарын стандарт, БНбД-ийн уялдааг хангах, хэрхэн сайжруулахад чиглэгдсэн санал дүгнэлтийг БХБЯ-д гаргаж өгсөн. Дээрх саналын дагуу стандарт, БНбД-г боловсронгуй болгох чиглэлийг тогтоож, стандартчиллын ажлын жил бүрийн төлөвлөгөөнд тусган хэрэгжүүлэх шаардлагатай байна.

Цаашид: 1. Стандартчиллын үндэсний хөтөлбөрийг шинэчлэн боловсруулах

2. Салбарын стандартын ажлыг жил, 5 жилээр төлөвлөх

3. Стандартчиллын ажлын санхүүжилтийн эх үүсвэрийг шийдвэрлэх зэрэг асуудлууд дэвшүүлсэн.

Үзлэгийг зохион байгуулахад БХҮНТөв түүний хамтран ажилладаг “Барилгын зураг төсөл зохиогчдын холбоо”, “Монголын барилгын материал үйлдвэрлэгчдийн холбоо”, “Монголын цонх, хаалга үйлдвэрлэгчдийн холбоо”, “Монголын Барилгын инженерүүдийн холбоо”, “Өргөн тээвэрлэх машин төхөөрөмжийн үндэсний холбоо” –д 4 ажлын хэсэгт хувиарлагдан салбарын үндэсний стандартын улсын үзлэг хийх ажлыг мэргэжлийн түвшинд богино хугацаанд чанартай гүйцэтгэлээ. Энэ нь төр хувийн хэвшлийн түншлэлийг бэхжүүлэх, мэргэжлийн түвшний үйл ажиллагаанд мэргэжлийн холбоод нэгдэн хамтран ажиллаж үр дүнд хүрч байгааг нотолж байна.

Цаашид БХБЯамтай БХҮНТөвөөс 2013-2016 онд хамтран ажиллах үйл ажиллагааны гэрээ, төлөвлөгөөний төслийг боловсруулан батлаж ажиллахаар саналаа оруулаад байна.

Барилгын хөгжлийн үндсэний нэгдсэн төв